مصطبه عشقده باده و مينايه باخ/ساقي گولرنگي گور ساغروصهبايه باخ
حلقه ريندانه گل دير موغان سئيرين ائت/اهل خرابات آرا مومن و ترسايه باخ
ذوق مئي عشقدن جوشا گليب شير تک/هي هي مستاني گور شورش و غوغايه باخ
شعشعه ي باده دن شمس اولوب منفعل/لمعه جام بلور هاله اولوب آيه باخ
نغمه چنگ و رباب شاهد شمع و شراب/همهمه سازي گور زمزمه نايا باخ
بولبول طبعيم يئنه اؤزگه نوا باشلاييب/ دئر کي گول اولموش خزان بو خبر وايا باخ
غم يئمه شاد اول کونول اولما بو سوزدن ملول/صبر ائله سن بير زمان قدرت مولايا باخ
امرينه موشگول دگيل کم ائده پير و جوان/ ائيله گوزوم اعتقاد بيرجه زوليخايا باخ
چکدي سوزون رشته سين بير بت ليلي خرام/ سالدي مني چوللره آه بو صحرايا باخ
آي سني تانري يئنه ائتمه پريشان مني/ بيرده منه سؤيلمه زولف چليپايا باخ
هيچ و عبث کونلومو ائتدي بو سوزلر تباه/ آخير اولوب حاصليم غم يوکو سئودايا باخ
اينجيمه دور چال قلم من سنه قوربان اولوم/قويما سوزو ناتمام طعنه اعدايا باخ
يوخسا يورولدون مگر ايلقا حله هارداسان/مسجد اقصي دي بو عرش معلايا باخ
قورخما دگيل اژدها بالله عصادير عصا/موسي عمران کيمي سن يد بيضا يا باخ
برق صفت قيل گوذر جمله حجاباتدان/ فوق ثريا يا چيخ منظر اعلايا باخ
شاه عرب لافتي وئرسه موراديم اگر/ نظم دررباري گور گوهر انشايا باخ
کلبه احزانيميز اولدو منور يئنه/ آچ گوزون اي بينوا يار مه آسايا باخ
زولف شکن در شکن طره پرپيچ و خم/ناوک مژگاني بير گوزله او شاخ يايا باخ
چوخدا سوزو آشکار ائتمه دانيش پرده ده/سنده حيا يوخ مگر عاشق رسوايا باخ
نقطه خالين يئنه سالدي مني حيرته/ منده داخي نطق يوخ کلک شکر خايا باخ
طائر فيکريم يئنه همپر سيمرغ اولو.ب/ سئير قيلار قافده بچه عنقايا باخ
داغلارا سال هوي هاي سسله ده مجنون هاراي/عاشق ديوانه گل هودج ليلايا باخ
جاني نثار ائتمه دين يارا"نباتي" فقير/ ايندي بو غمخانه ده ها شب يلدايا باخ.