تا کي بنياد ايلرم رخسار جاناندان حديث
ائيله بيل کيم ايلرم گولزار جاناندان حديث
توتدوغو ايشدن پشيمان اولدو چکدي آه سرد
ائيله ديم چون خيضره تا اول لعل خنداندان حديث
اي سرشک لاله گون آماده اول گل کيم ائدر
خامه ي مشکين رقم زولف پريشاندان حديث
دورما اي پيک صبا عشاقي احضارائت تمام
تا ائدم من درد عشقه ذوق درماندان حديث
قوي قدم ميدان عشقه جهد قيل مردانه وار
باشيني اورتايا سال ائت گوي وچوقاندان حديث
عروه؛الوثقي کي دئرلر تار زولف ياريميش
توت بو محگم رشته ني ائت گنج پنهاندان حديث
غافيل اولما ناله شبگير وآه صبحدن
واصل اول دلداره آز ائت شام هيجراندان حديث
من کي مي دن کوسموشم عفو ايله سن ساقي مني
کوفردور گر بيرده ائتسم راح وريحاندان حديث
جومموشام درياي عشقه غوطه ور غواص تک
چکميشم دم ائيلرم بير درّ غلطاندان حديث
پرتو انوار حوسنون گورسه زاهد حق بيلير
ترک ائدر فردوسي ائتمز حور و غلماندان حديث
نقطه خالين خيالي لال ائديبدير نطقومو
کيم نه تقريب ايله قيلسين جوهر جاندان حديث
عشق بازاريندا آنجاق حوسن گفتار ايستيرم
طبع گوهرباريم ائيلر ماه کنعاندان حديث
بس کي خوگر اولموشام مهرولارين گفتارينه
لحظه- لحظه ائيلرم خورشيد رخشاندان حديث
بير پري پيکر نيگارين وصفيني شرح ايلرم
ائتمنم من اوزگه لر تک خان و سولطاندان حديث
اي دبير نکته پرور طوطي شيرين زبان
دم به دم هو هو چکيب ائت صدر دوراندان حديث
هادي راه حقيقت مرشد صاحب نظر
نقطه پرگار عالم بحر عرفاندان حديث
خسرو شيرين و فرهادي نظامي دن سوروش
کيم " نباتي" دائم ائيلر شاه مرداندان حديث.