تبريز
شبلي دن گوروندو گول تک جمالين
گلديم بولبول کيمي فغانه تبريز
اولدو قسمت يئنه سنين وصالين
بو قلبي چيرپينان جوانه تبريز
.............................................
سنه قوربان اولوم سئوديگيم وطن
هر يئرين باغچادير هر يئرين چمن
چمنلرده آچيب گوزل ياسمن
عطريندن گليرم ايمانه تبريز
..........................................
دئيلير آدينا داروالسلطنه
شاهلار شاهزاده لر باش اگيب سنه
داغلارين داشلارين دؤنسون گولشنه
باهارين دؤنمه سين خزانه تبريز
..........................................
سن منه آناسان ائل منه آتا
آنا ائولاديني روادير آتا؟!
باغلارام قمه ني مينه رم آتا
وئرمه رم تئليني جهانه تبريز
........................................
کئچمه سين چراغين يانسين اوجاغين
جنت گوشه سي دير هر بير بوجاغين
آنامدان عزيز دير منه قوجاغين
گلمز محبتيم بيانه تبريز
.................................................
نا اميد گورمه يير گوزوم هيچ کسي
گلير سحر- سحر قوشلارين سسي
گؤي مچيد بناسي ارکين قالاسي
قاليب کئچميشيندن نشانه تبريز
.............................................
هاني بس قهرمان ستارخان هاني؟
چاغير امدادينا او مرد انساني
بلکه اصلاح ائده آذربايجاني
بير تکان وئره بو زمانه تبريز
...........................................
شاعرم اؤره گيم دولودور دولو
آچيقدير اؤزومه حقيقت يولو
تؤکؤلسه باشيما گؤيلردن دولو
ديزلريم بوکولمز دوشمانه تبريز