سن سيز ائله بيلمه اؤله جه يه م من
قارا بير کدره دؤنه جه يه م من
گئجه لر يوخونا گله جه يه م من
سن مني اونودا بيلمه يه جک سن

عمرونده ناراحات ايزيم قالاجاق
آلووم سؤنسه ده کؤزوم قالاجاق
آرخانجا هميشه گؤزوم قالاجاق
سن مني اونودا بيلمه يه جک سن

سن ائله بيلمه کي غمدن اوزاقسان
عمرونو گونونو اودوزاجاقسان
اؤزونو بلکه ده اودوزاجاقسان
سن مني اونودا بيلمه يه جک سن

مني اونوتماغا عينادين کيمي
ايلک سئوگي آغريسي ، فريادين کيمي
لاپ اؤز آدين سوي آدين کيمي
سن مني اونودا بيلمه يه جک سن